Tout bèt jennen mòde

Tout bèt jennen mòde

M pito mouri entoksike 

Nan rale lafimen

Chicha kawotchou sou beton

Olye se nan fouk kabann

Pou lafen fann fwa m

M pa moun, m se yon bèt

Grangou achte mounite m

San yon goud

M bouke koud

Gout laswè m

Sou tisi pousyè lari

Pou se san soupe 

M pase aswè m

Pa gen myèt lespwa ki rete 

Alò m soti kwòk kòk mwen

M ap batay

Se pa pou mwen ankò

Se yon jòf demen

M ap machande pou pitit mwen

Alò m la

La sou beton an ap trase kata

Anba wòch ak gaz lakrimojèn

Kòm pa gen krè

Ankò pou ekri mo jèn

Rele m zonbi

M la sou beton an

Ap chèche grenn sèl

Pou zantray mwen

Pa gen lespwa ki rete 

Kanari l sèch, sous li tari 

Men m pito mouri nan chèche

Olye se nan rete tann